Ad-adda a napaingetan pay ti maipatpatungpal a seguridad dagiti kameng ti National Bureau of Investigation headquarters iti nakaibaludan ni Shiela Guo ken Cassandra Li Ong, nga agpada a naipasidong iti proseso idi kalman ken adda ita iti kostodiya dagitoy.
Saan a bummaba ti lima a lugan ti simrek iti NBI headquarters ngem saan nga indetalye dagiti security personnel ti aniaman nga impormasion nu siasino ti adda iti uneg ti pagbaludan.
Kabayatanna, pinaglibakan ti abogado ni Guo a ni Atty. Stephen David, ti amin a reklamo kontra iti kliyentena para iti panagpeke ken panagaramatda ti peke a passport, ken inladawanna daytoy kas “baseless” wenno awan ti pakaibasaranna ken addayo iti kinapudno.
Impaganetget pay ni Topacio nga iligal ti pannakakemmeg ni Ong.
Nupay kasta, imbalakad ti Department of Justice a mabalin a mangipaay ni Ong ken Guo ti kiddaw a pannakawaya-waya.
Manamnama nga agparang ni Guo ken Ong iti public inquiry wenno panagdinggeg iti Senado ti Philippine Offshore Gaming Operators (POGO) inton Martes, Agosto baente siete.
Kabayatanna, impakaamo ni Undersecretary Nicholas Felix Ty a da Shiela Guo ken Cassandra Li Ong ket sumango iti posible a reklamo kagiddan ti agtultuloy nga imbestigasion dagiti otoridad iti na-raid a Philippine Offshore Gaming Operators idiay Bamban, Tarlac ken idiay Porac, Pampanga.
Ni Sheila Guo ket posible a sumango iti nagduduma a kaso gapu iti panaglabsingna iti Philippine Immigration Law, Falsification under the Revised Penal Code, ken ti Philippine Passport Act.
Ni Ong met ket maipasango iti reklamo nga Obstruction of Justice ken panaglabsing ti Philippine Immigration Law.
Iti agdama, manarimaan paylaeng ti imbestigasion iti maatap a money laundering ken qualified trafficking of persons seknan iti na-raid a Philippine Offshore Gaming Operators.
