Naituding ita a Setiembre a mapagtalantanan dagiti nabatbati a “priority bills” iti sidong ti administrasion ni President Ferdinand Marcos Jr sakbay ti bakasion dagiti mammanday-linteg iti ngudo iti agdama a bulan, sigun kenni Senate President Francis ”Chiz” Escudero.
Kinuna ni Escudero a nabalinanda a napagtalantanan ti 7 agingga 8 a gakat nga inyendorso ti Legislative-Executive Development Advisory Council (LEDAC).
Daytoy ti rason a matalek ti Senado a maileppas ti nabatbati a gakat iti uneg ti siam a nabatbati nga aldaw ti session, ken saanen a dinakamat ni Escudero dagitoy.
Agpada nga agleppas ti aldaw ti session iti Senado ken Kamara inton Setiembre 27, 2024, ken agsubli daytoy inton Nobiembre 4, 2024.
Idi Hunio, immanamong ti LEDAC nga ipangpangruna ti pannakaipasa ti 28 a gakat iti uneg ti 19th Congress wenno sakbay ti Junio 2025, pakairamanan ti Archipelagic Sea Lanes Act, pannaka-amyendar ti Right-of-Way Act, pannakatalantan ti “excise tax” iti “single-use plastics,” “rationalization” iti “mining fiscal regime,” “VAT” iti “digital services,” ken ti pannakabukel ti Department of Water Resources.
