Sinuportaran ni Senate President Pro Tempore Panfilo “Ping” Lacson ti addang ti Department of Energy (DOE) a mangituding iti minimum ken maximum a garaw iti presio ti lana, kasaruno ti pannakaideklara ti state of national energy emergency.
Sigun kenni Lacson, nasaysayaat daytoy ngem bay-an dagiti oil company a mangdiktar iti presio, la ketdi nainkalintegan ti agbalin a basaran ti Department of Energy.
Kinunana a mapatpatagan metlaeng daytoy iti sidong ti Oil Deregulation Law nu sadinno kasapulan para iti pagimbagan ti publiko.
Ummanamong metlaeng ni Sen. Sherwin Gatchalian, a nangibaga a panawenen tapno maksayan ti agsasaruno a panagngato ti presio iti petrolio sipud pay idi Marso.
Impaganetgetna a kasapulan nga agbalin a nalawag ti basaran ti oil price hike ken agtultuloy a bantayan daytoy.
Kabayatanna, binabalaw met ni Senador Imee Marcos ti DOE gapu iti mapapati a naudi a pablaak daytoy. Kinunana a nasapa kuma daytoy a naipatungpal tapno nakatulong a dagos kadagiti naapektaran a sektor a kas kadagiti drayber, mannalon, ken mangngalap.
Agtultuloy paylaeng a nakapokus ti Senado iti garaw ti presio ti lana tapno maipasigurado a saan daytoy a nalabes ken nainkalintegan para iti publiko.
