Inwaragawag ti National Bureau of Investigation (NBI) nga adda ti indikasyon nga adda iti pagilian a Pilipinas ni Senador Ronald “Bato” dela Rosa.
Sigun kenni National Bureau of Investigation (NBI) Director Melvin Matibag, adda ti sursurutenda nga impormasion wenno lead mainaig iti posible a lokasion ti Senador.
Inlawlawag ti NBI Director a marigatan a makaruar iti pagilian ni dela Rosa gaputa dumanon iti 132 a pagilian ti miembro iti International Criminal Court (ICC).
Sumangsango iti arrest warrant ni dela Rosa manipud iti ICC kalpasan a nainaganan kas maysa a co-perpetrators ni sigud a President Rodrigo Duterte iti kaso a crimes against humanity mainaig iti war on drugs.
Kabayatanna, impeksa ni Matibag nga awan ti naawatda a kanayonan nga arrest warrant manipud iti ICC.
Daytoy ti sungbat ti NBI Director maipapan iti maatap a warrant a naipaulog kontra ken ni Sen. Bong Go.
