Impetteng ni Senator Win Gatchalian a kasapulan pay ti panangisimpa idiay senado nangnagruna iti maipanggep iti imahe daytoy.
Daytoy ket kasaruno iti serye ti gulo a napasamak idi napalpalabas a lawas.
Dinakamat ti nasao a senador nga agwarwarasen dagiti bidyu ti senado idiay internet no sadino nagbalinen daytoy a pagkakatawaan ti publiko.
Sigun kenni Sen. Gatchalian, kasapulan a makita daytoy ti mannarimaan a liderato wenno asinuman a sumukat a lider ti senado.
Innayonna pay nga iti las-od ti sangapulo a tawenna kas senador, tatta na laeng a naeksperyensya ti kastoy kagulo a senado.
Innaklon ti senador a naapektaran ti dignidad ken imahe ti senado nangnangruna iti napasamak a pinnaltog iti uneg ti senate building idi Mayo 13.
Maipalagip a nadakamat ti nagan ni Senator Gatchalian kas maysa kadagiti maidurduron kas senate president.
Immuna metten nga inyebkas dagiti dadduma a senador ti kumpiyansada iti kabaelan ni Senator Gatchalian a mangidaulo. //bombokaren.c.sapirao
