BAGUIO CITY – Mairikep kadagiti lugan ti pasang-at ken pasalog a lane ti Session Road manipud iti Baguio Post Office agingga iti Magsaysay Avenue iti alas siete ti agsapa agingga alas siete ti rabii inton March 14, aldaw ti Dominggo para iti “Sunday Market Showcase”.
Ditoy a maiparang dagiti produkto ti Micro, Small and Medium Enterprises (MSME) ditoy siudad.
Maipalubos met ti panangidiaya dagiti restaurants iti deppaar ti Session Road iti al fresco wenno outdoor dining services kabayatan ti nasao nga aldaw.
Maibalbalakad ti panakikoordinar iti City Planning and Development Office ken iti City Tourism Office dagiti MSMEs a kayatda a makipaset iti aktibidad.
Inlawlawag met ni Mayor Benjamin Magalong a napintas ti Session Road a pakaisayangkatan ti nasao nga aktibidad gapu iti kaasideg, espasyo ken kalawa daytoy a mangipasigurado iti panakasurot ti minimum public health protocols.
Innayonna a ti panagballigi ti masungad a Sunday Market Showcase ti agserbi a basaran iti panakasustinir ti aktibidad para iti panakaital-o ti entrepreneurship wenno panagnegosyo dagiti umili ti Baguio bayat a masursurot ti minimum public health standards.
