BAGUIO CITY – Dakkel ita ti akem dagiti OFWs ken Pinoy immigrants sadiay Canada kagiddan ti mapaspasaran nga epekto ti krisis nga ituntunda ti COVID-19 pandemic.
Impannakkel daytoy ni Bombo International Correspondent Melchor Tomanan, admin assistant iti maysa a tissue company sadiay Toronto City, Canada ken tubo ti Baguio City iti panakiyuman kenkuana ti Bombo Radyo Baguio.
Imbingayna a kaaduan kadagiti Pilipino sadiay Canada ket agtatrabaho kadagiti paktorya, iti cleaning services ken kadagiti opisina ken kaaduan ita nga essential jobs sadiay Toronto City ket iggem dagiti Pilipino.
Sigun kenkuana, adda latta ti trabahona gaputa karaman daytoy kadagiti essential workers ngem no adda ti katrabahuanda nga agsakit ket dagus a maisardeng ti trabaho dagitoy kas precautionary measure.
Kinunana a dua a lawas a nagrikep ti kompanyada ken naituding nga agtuloy manen ti operasyon dagitoy.
Impannakkel pay ti sigud a barangay kagawad a napintas ti panagtinnulong ti Filipino Community sadiay Toronto City gaputa mangipapaayda iti tulong kadagiti kailyan sadiay a naawanan ti trabaho.
Innayonna nga adda latta ti tulong ken benipisyo manipud iti gobyerno ti Canada a maaw-awat dagiti tattao sadiay nga apektado iti COVID-19 pandemic, pakairamanan dagiti immigrants ken foreign workers.
Kabayatanna, imbingay ni Tomanan a napintas ti implementasyon sadiay Canada dagiti paglintegan tapnu makaliklik ti publiko iti COVID-19 ken iti panakaiwaras ti nasao a virus.
