Kiniddaw ni sigud a Department of Public Works and Highways (DPWH) Secretary Manuel Bonoan iti Ombudsman nga agserbi kas state witness iti imbestogasyon ti naanomalyaan a flood control projects iti pagilian.
Kasukat daytoy ti “tell-all” wenno ti panangibutaktakna iti amin nga ammona maipapan iti maatap a korapsion iti nasao a proyekto ti gobierno.
Intukon pay ni Bonoan ti panangibutaktakna kadagiti nangato ti ranggona nga opisial ti publiko ken pribado nga idibidual a maatap a nairaman kadagiti anomalya.
Pinatgan daytoy ti Ombudsman gapu iti direkta a pannakaammo ni Bonoan maipapan iti maipagarup a korapsion.
Maibasar iti mosion, adu a tawen a nagserbi ni Bonoan kas dadaulo ti DPWH isu’t gapuna nga adda ti ammona kadagiti banag a mabalin a makatulong iti agtultuloy nga imbestigasion ti flood control ken dadduma nga infrastructure projects.
Sigun iti Ombudsman, dinakamat ni Bonoan ti kumapkapuy a salun-atna kas maysa a rason ti pannakitinnulongna.
Sumangsango ni Bonoan iti kaso a plunder and graft mainaig iti maatap a P573-milion a kickback a nakairamanan ni Senator Jinggoy Estrada.
