Kinompirmar dagiti otoridad a pimmusay ni sigud a DPWH Undersecretary Maria Catalina Cabral kalpasan a nasarakan nga “unconscious ken unresponsive” iti igid ti Bued River sadiay Kennon Road, Tuba, Benguet idi Disiembre 18, 2025.
Indeklara dagiti otoridad a pimmusay daytoy iti 12:03 a.m. idi Disiembre 19.
Immuna a nasarakan daytoy iti 20 agingga 30 meters iti baba ti highway, sumagmamano nga oras kalpasan a kiniddawna iti driver daytoy a mabati paylaeng iti paset ti Kennon Road.
Maibasar iti inisyal nga imbestigasion dagiti otoridad, rumrummuar nga “alleged fall ti napasamak nga insidente.
Sigun kadagiti otoridad, pasado 3:00 p.m idi Huebes ket agdaldaliasat da Cabral ken ti driver na iti Kennon Road nga agturong iti La Union.
Ditoy a kiniddaw ni Cabral a pasardengen ti driverna ti lugan, partikular iti Camp 4, ken kiniddawna a mabati sadiay.
Nagsubli ti driver iti pasado 5 p.m ngem saannan a masarakan ni Cabral.
Gapu iti dayta, nagkiddaw iti tulong kadagiti otoridad iti pasado 7 p.m.
Pasado 8:00 p.m ti kapada nga aldaw, idiaydan a nasarakan ni Cabral iti igid ti nasao a karayan.
Mainaig iti dayta, naiturong iti maysa a puneraria iti Baguioc City ti bangkay daytoy ken simmangpet metten dagiti pamiliana.
Kabayatanna, agtultuloy paylaeng ti imbestigasion dagiti otoridad seknan iti nasao nga insidente.
Maipalagip a maysa ni Cabral kadagiti opisial ti DPWH a nairaman iti flood control project scandal.
