Impeksa ni sigud nga United States President Donald Trump nga awanen ti sumaruno a mapasamak a debate dagitoy kenni US Vice President Kamala Harris.
Sigun kenni Trump, saanen a maipatungpal ti maikatlo a debate nangruna ket mamati daytoy nga isuna ti nangabak kadagiti napalabas a dua a debate.
Maipalagip a ti immuna a debate daytoy ket kenni US President Joe Biden idi Hunyo ken ti maikadua ket kenni Harris idi napalabas a Setyembre a onse iti agdama a tawen.
Kabayatanna, kiddaw ti kampo ni Harris ti panakaipatungpal iti sabali a debate iti nagbaetan dagitoy kenni Trump gapu ta ado pay dagiti rumbeng a maamoan dagiti rehistrado a botante.
Iti nagbalin nga anunsyo ni Trump nga awanen ti debate a maisayangkat, impeksa ti kampo ni Harris a posible ladta nga adda ti sumaruno a debate agsipud ta kinunada a pabaliw-baliw ti desisyon ni Trump.
Inyebkas met ni Trump nga “very unfair” ti napasamak a debate dagitoy kenni Harris gapu ta kasla adda pabpaboran dagiti nagbalin a host ngem inyunay-unayna nga isuna ti nangabak iti nasao a banag iti laksid a ni Harris ti rumrumwar a nangabak kadagiti naipatungpal a poll survey.
