BAGUIO CITY – Kinumpirmar ti Commission on Elections-Benguet ti panagsanod ni sigud a Vice Governor Nelson Dangwa iti Certificate of Candidacy daytoy para iti kina-gobernador ti probinsia.
Sigun iti COMELEC- Benguet , nagturong ti nasao s kandidato iti opisina dagitoy ken impilana ti withdrawal iti COC daytoy iti oras ti alas singko iti malem ti Sabado.
Saan met a idinakamat ti COMELEC-Benguet ti rason iti panagsanod ti kandidatura ti nasao a kandidato.
Gapu iti daytoy, lima laenen a kandidato tu agbabalubal para iti kina-gobernador iti probinsya a buklen da Robert Namuro, Jerome Wakat, Jerry Marave, Alexander Tadina ken ti madama a gobernador Melchor Diclas.
Maipalagip a mabalin latta nga agsanod wenno agwithdraw iti COC dagiti kandidato sakbay ti May 2022 Elections ngem saanen a masukatan dagitoy malaksid laeng no adda ti pumusay wenno madiskwalipikar.
Iti kanito a mapasamak daytoy, masapul a kapartido metlaeng ti pimmusay a kandidato ti mangsukat kenkuana wenno masapul nga agpada ti apelyido dagitoy partikular dagiti kapamilya wenno kabagyan daytoy.
Maipalagip nga daytoyen ti maikadua nga kandidato iti probinsya a nangisanod iti kandidaturana nu sadinu immunan a nangsanod ni sigud a Benguet Governor Crescencio Pacalso iti kandidaturana iti kinakongresista.
