Naituding a makilaban ni three time World Boxing Bantamweight challenger King Arthur Villanueva idiay Las Vegas, Nevada idiay Amerika inton sumaruno a bulan.
Iti exclusive interview ti Bombo Radyo kenni Villanueva, panggepna a makastrek iti world ranking ti Bantamweight division babaen ti panangabakna kontra kenni American world rated boxer Saul Sanchez iti manamnama a laban dagitoy.
Sigun iti Pinoy boxer, napagdesisyonanna nga agsubli iti Bantamweight division manipud iti Junior Featherweight Division kalpasan a naabak daytoy kontra kenni Elijah Pierce idi napalabas a Marso iti agdama a tawen.
Iti agdama, masansan ti panagensayo daytoy iti Knuckleheads Boxing Gym ti MP Promotions a tagikua ti Sean Gibbons.
Kabayatanna, mamati ti 35-anyos a boksingero a kayana pay ti makilaban ken makisabay para iti arapaapna nga agbalin a world boxing champion.
Maipalagip a ni Villanueva ket sigud a kampeon ti World Boxing Organization (WBO) Asia Pacific super flyweight, World Boxing Organization (WBO) International super flyweight ken International Boxing Federation (IBF) International Jr Bantamweight.
