Addaan laengin iti pawayway ni sigud nga Ako Bicol Party-list Representative Elizaldy “Zaldy” Co agingga inton January 15 tapno sungbatan wenno mangipaay daytoy iti counter-affidavit seknan iti kaso a plunder a naipila kontra kenkuana.
Sigun kenni Department of Justice(DOJ) spokesperson ken prosecution attorney Polo Martinez,awan pay ti nagparang nga abogado wenno counsel para kenni Zaldy Co iti naangay a preliminary investigation.
Ti kaso a plunder kontra kenni Co ket impila iti National Bureau of Investigation (NBI) ngem saanen a nangipaay ni Atty. Martinez iti kanayonan nga impormasyon seknan iti nasao a kaso.
Nupay kasta, iti paglintegan iti Pilipinas, ti plunder ket mabalin nga ipila kadagiti public officials mapapati a nangibulsa iti saan a bumaba iti ₱75 million nga ill-gotten wealth babaen kadagiti nagduduma a maiparit a pamay-an kas iti iligal a panangaramat iti pondo, panangawat kadagiti kickbacks, wenno pananggundawayda iti posisyon dagitoy.
Kabayatanna, maipalagip met nga immunan a naipiyulog ti arrest warrant kontra kenni Co ken dagiti 17 a daduma pay nga indibidwal gapu iti kaso a malversation of public funds nga aggatad iti ₱289.5 million a para koma iti flood control project idiay Mindoro.
