Nakaawat ni sigud nga Ilocos Sur governor Luis “Chavit” Singson ti violation ticket kalpasan a nagdalan ti convoy dagitoy iti EDSA busway ita laeng nga aldaw, sigun iti Metropolitan Manila Development Authority.
Ni Singson ket adda iti uneg ti maysa kadagiti lugan.
Sigun kenni Metropolitan Manila Development Authority special operations group – strike force head Gabriel Go, iyem-implemetarda laeng ti linteg isut gapuna a nu saan a naotorisaan nga agdalan iti bus lane ti maysa a lugan, rumbeng a matiliw daytoy.
Sigun met kenni Go, saan a nagduadua ni Singson a mang-ala iti violation ticket daytoy.
Nangrugi idi Nobiembre idi napalabas a tawen, amin a motorista nga agus-usar ti EDSA bus lane ket maipaayan ti nadagdagsen a pannusa wenno multa nga agingga ti P30,000.
Iti sidong ti Metropolitan Manila Development Authority Regulation No. 23-002, dagiti parapubliko ken pribado a lugan nga aglabsing ket maipaayan ti P5,000 para iti umuna a panaglabsing, P10,000 ken maysa a bulan a pannakasuspindir ti driver’s license ken maipasidong iti road safety seminar para iti maikadua a panaglabsing; P20,000 ken maysa a tawen a pannakasuspindir ti driver’s license para iti maikatallo a panaglabsing; bayat P30,000 ken pannakairekomendar iti Land Transportation Office ti pannakaikkat ti driver’s license para iti maika-uppat a panaglabsing.
