Inaprobaranen ni President Ferdinand ”Bongbong” Marcos Jr. ita nga aldaw ti nalawlawa a saklawen ti Pantawid Pamilyang Pilipino Program (4Ps) babaen iti pannakairamanda kadagiti masikog ken agpaspasuso a nanang tapno maipasigurado ti salun-at dagiti annak dagitoy iti umuna a 1,000 nga aldaw.
Daytoy ket bayat ti panagtaripnong ken panagtalantanda iti panagreporma ti 4Ps cash grants kaduana ti National Economic and Development Authority (NEDA), Department of Social Welfare and Development (DSWD), Department of Health (DOH) ken dadduma pay a maseknan nga ahensia iti Malacañang Palace.
Ti inaprobaran ti presidente ket singasing ti DSWD para kadagiti masikog ken agpaspasuso a babbai.
Gapu iti dayta, imbilinna ti DSWD ken ti NEDA a mangaramidda ti pinal a bilang ken ipaayda kenkuana tapno maaramid ti kasapulan a panagbalbaliw iti panangipaay ti pinansial a tulong.
Idi laeng Pebrero nga insingasing ti DSWD ti panagngato ti 4Ps grant amounts ken mangipaay ti cash grants iti First 1,000 Days (F1KD) ti ubbing.
Dagiti nadakamat a panagbalbaliw ket mangpaadu iti purchasing power dagiti benepisiario ti 4Ps ken mangipaay iti insentibo para kadakuada a mangpasayaat iti panagtungpal kadagiti kondision ti programa a manglapped iti malnutrision ken “stunting”.
