Inawagan manen dagiti labor groups ni President Ferdinand Marcos Jr. a sertipikaranna kas “urgent” ti singasing a gakat a mangipaulog iti linteg ti P200 a panagngato ti sueldo iti Pilipinas.
Idagdagdag dagiti kameng ti National Wage Coalition (NWC) ti apelada kagiddan ti kiddawda a sertipikasion ti addang tapno masigurado ti pannakaipasa daytoy sakbay ti panagserra ti maika-sangapulo ket siam a Kongreso.
Sigun kenni TUCP Vice President Luis Corral, kasapulan a masigurado a maipasa iti third reading ken mapirmaan nga agbalin a linteg ti ipagpaganetgetda a panagngato ti sueldo, gapu iti kumarkaro a bisin ken kinapanglaw iti agdama a panawen.
Ti Kongreso ket naka-break idi Pebrero 5, 2025 tapno maipaayan dagiti kandidato nga agkampania para iti masungad nga eleksion.
Agsubli ti “session” dagiti opisial ti Kongreso inton Hunio 2 agingga iti sine die adjournment inton Hunio 13, 2025.
Maipalagip nga idi Pebrero, inaprobaran ti House of Representatives iti maikadua a pannakaibasa ti House Bill No. 11376 wenno ti “Wage Hike For Minimum Wage Workers Act” a maipangato ti inaldaw a sueldo dagiti amin a minimum wage workers iti pribado a sektor, uray ania ti kasasaad ti panggedan, iti P200 iti tunggal aldaw.
