BAGUIO CITY – Impetteng ti dadaulo ti Committee on Public Utilities, Transportation, and Traffic Legislation iti siyudad ti Baguio a nasken pay a maadal a nalaing ti singasing ti maysa a konsehal a mangimanmandato kadagiti amin a Public Utility Vehicle nga ipangrunada nga ilugan dagiti estudyante manipud alas sais dies ti agsapa agingga alas sais singkwentay singko ti agsapa, lunes agingga biyarnes.
Iti nasao a singasing, mamulta dagiti driver a saan a sumurot iti daytoy, P3,000 ken notice of violation iti 1st offense; P4,000 ken suspension ti prangkisa iti 2nd offense bayat a P5,000 ken suspension ti prangkisa iti 3rd offense.
Iti panakiuman ti Bombo Radyo kenni Councilor Benny Bomogao, napintas ti panggep ti padana a konsehal a nangipila iti nasao a singasing gapu ta matulongan dagiti estudyante.
Nupay kasta, impeksana a nasken a dumalan daytoy iti public consultation tapno awan ti malabsing a linteg ken awan to ti agbalin a parikut kas ti panakailaksid dagiti dadduma a pasahero.
Inlawlawag ni Bomogao nga adda ti pagannurutan ti Land Transportation Franchising and Regulatory Board a sursuroten dagiti public utility vehicles iti panagbiahe dagitoy.
Kabayatanna, guyguyogoyenna met dagiti pribado a lugan nga iluganda dagiti malabasanda nga estudyante nangruna nu nawaya ti lugan dagitoy a kas iti ar-aramidenna tunggal aldaw.//Marinel Rodrigo
