BAGUIO CITY – Supsuportaran ti Liga ng mga Barangay ditoy Baguio City iti panggep a pannakaisubli ti market schedule ti syudad.
Iti interview ti Bombo Radyo Baguio kenni ABC President ken Councilor Michael Lawana, maksayan ti panaggaraw wenno iruruwar dagiti tao kadagiti pagtaenganda babaen iti daytoy.
Kinunana a kaaduan kadagiti barangay officials ket mamati a dakkel ti agbalin a tulong daytoy ti pannakakissay ti kaso ti COVID19 ditoy syudad.
Kagiddan iti daytoy, kinunana nga ipalubosda iti operasyon dagiti talipapa kadagiti barangay agsipod ta dakkel a tulong daytoy kadagiti umili tapnu saandan a masapul a rumwar kadagiti pagtaenganda nga agtienda agsipod ta adda a mailako kadagitoy dagiti kangrunaan a kasapulanda.
Kinunana nga isaganada iti pannakaisubli ti rolling market kadagiti barangay tapnu maiyasideg kadagiti umili dagiti basic commodities a magatgatang iti sentro ti syudad.
Kabayatana, saan nga umanamong ti ado a vendors iti Baguio City Public Market iti nasao a panggep.
Impetteng ni Jocelyn Lindo, maysa a vendor iti Block 4 Relocation ti Baguio City Public Market nga ad-adda a makaapektar iti pamastrekanda no maituloy ti nasao a market schedule.
kinunana nga ita paylaeng ket bimmasit dagiti costumers dagitoy gapu iti mapaspsaran a pandemya no sadino karkaro pay a maksayan ti costumers dagitoy no maipatungpal ti market schedule.
Immanamong met ditoy ni Manuela Cruz, ti mangidadaulo iti Vegetable Section ti merkado publiko no sadino kinunana a saan a solusion ti market schedule tapno makontrol ti panagwaras ti virus iti public market.
Kinunana a kasapulan laeng ti disiplina dagiti market goers kasta met ti nainget a panagbantay dagiti otoridad tapno maipanamnama a masursurot dagiti paglintegan ti COVID10 iti merkado.
Maipalagip nga ad-adalen ita ti lokal a gobierno ti siudad ti Baguio ti panakaisubli ti market schedule kas addang tapnu malapdan ti agtultuloy a panagngato ti kaso ti COVID-19 iti lokalidad.
Immunan a dinakamat ni Mischelle Junio, Data Analyst ti Contact Tracing Team ti Baguio a nakikoordinarda kenni PCol. Glenn Lonogan, dadaulo ti Baguio City Police Office mainaig iti nasao a plano.
Iti baet daytoy, impanamnama dagiti market vendors ti panagsurotda kadagiti minimum public health standards kontra iti COVID-19. (with Bombo Brigit Marcasi)
