BAGUIO CITY -Naituding a maangay inton bigat ti agmalmalem a Solo Parent Summit sadiay Baguio City National High School auditorium mangrugi iti alas ocho ti agsapa.
Daytoy ket paset ti panangselebrar ti siudad iti Solo Parent Week a maramrambakan iti sibubukel a pagilian iti agdama.
Iti panakiuman ti Bombo Radyo kenni Councilor Elmer Datuin, maipatungpal iti nasao a summit ti lecture, information caravan ken daduma pay nga adda pakainaiganna kadagiti solo parent rason a maguyguyugoy dagitoy nga umatendar.
Malaksid iti dayta, mapalpalagipan dagiti solo parent nga agparehistro dagitoy kadagiti social welfare officers iti babarangayda tapno makaala dagitoy ti ID ken benepisyo.
Sigun pay kenni Datuin, 65 manipod iti 128 a barangay iti Baguio City ti addaanen ti full pledged solo parent organization.
Gapu iti dayta, guyguyugoyenna dagiti daduma pay a barangay a mangbukel dagitoy ti kapada nga organisasyon para iti panakaipaay ti naan-anay a suporta kadagiti solo parent iti siudad.
Kabayatanna, naituding metlaeng a maangay ti Solo Parents Service Caravan inton April 21 sadiay Malcom Square ken Session Road nu sadino maaramid dagiti nagduduma a serbisyo ken aktibidad kas iti medical mission.
Immuna metten a naiyuswat ti programa para iti panakaobserbar ti Solo Parents Week sadiay city hall idi Lunes.//Bombo Rob Dominguez
