BAGUIO CITY- Naisubmitirin ti maysa a resolution a mangkidkiddaw ti anti-venom vaccine kagiddan ti panagruar dagiti cobra kadagiti sumagmamano a paset ti siudad ti Baguio.
Iti pannakiuman ti Bombo Radyo kenni Honarable Mylen Yaranon, Baguio City Councilor, kinunana a nasken a mangisagana ken ag-stock ti Baguio City General Hospital Medical Center (BGHMC) iti nasao a bakuna tapno adda mausar apaman nga adda ti makagat ti cobra.
Sigun kenkuana, nasaysayaat nga agurnong ti stock ti nasao a bakuna tapno nakasagana latta apaman nga adda ti mapasamak nga insidente.
Kabayatanna, al-allukuyenna met dagiti private clinic, health centers ken dagiti private hospitals iti siudad tapno mangidulin dagitoy ti stock ti nadakamat a bakuna.
Iti agdama, awan paylaeng ti sungbat ti Baguio City General Hospital Medical Center (BGHMC) iti nasao a resolusyon.
