BAGUIO CITY – Kinumpirmar ni Mayor Romeo Salda a nakanselar ti Strawberry Festival 2020.
Inlawlawagna a daytoy ti nagbalin a pangeddeng dagiti opisial ti munisipio ken maipatungpal laengen ti aktibidad inton sumaruno a tawen gapu iti pangta ti Wuhan coronavirus.
Mainaig iti daytoy ket dinakamat pay ti mayor a suspendido dagiti tourism activities ti munisipio ken dadduma pay nga aktibidad a makaawis iti adu a tattao.
Nupay kasta, impetteng ti mayor a saan a naka-lockdown ti munisipio kadagiti sangaili.
Mainaig iti daytoy ket impanamnama ti opisial a nakasagana ti lokal a gobierno nga agtulnog kadagiti pammilin tapno malapdan ti nasao a virus.
Kinunana nga iti pannakitaripnongda ken ni Pres. Rodrigo Duterte idi kalman ket nabilin dagiti mayor a tumulong a mangiwaras kadagiti impormasion nga ipapaay ti Department of Health seknan iti coronavirus.
Dinakamat pay ni Salda a nangbukel ti lokal a gobierno ti La Trinidad iti grupo nga agbantay kontra iti coronavirus ken aktibo metten ti Barangay Health Emergency Response Teams (BHERTs) ti munisipio.
