BAGUIO CITY – Apektado dagiti kakailyan a Cordillerans nga agnanaed kadagiti lugar nga apektado iti ashfall nga ituntunda ti panagbettak ti Taal Volcano sadiay Batangas.
Sigun kenni Dr. Claire Adan-ad nga agnanaed ita sadiay Imus, Cavite, mapaspasaranda ladta ti napuskol a dapo nupay bumasbassiten no idilig kadagiti napalpalabas nga aldaw.
Kinunana nga iti baet daytoy ket addada iti natalged a kasasaad nangruna ta agtungtungpalda kadagiti pagalagadan nga ipapaulog dagiti otoridad.
Dinakamatna a nagserbi met kas evacuation center dagiti dadduma nga establishimento sadiay Imus, Cavite.
Innayon pay ni Dr. Adan-ad nga agingga ita ket awan pay ti serrek iti nagduduma a pagadalan iti amin a lebel iti ayanna a lugar ken dagiti empleado ti nagduduma nga ahesia ti gobyerno.
