Narikna ken napadasan dagiti lallaki nga empleyado ti maysa a telecommunication firm idiay Tokyo, Japan ti sakit a mapaspasaran dagiti babbai tunggal madanun ti menstruation dagitoy.
Babaen iti VR electrical device ‘Perionoid’ a maikabil iti bagi ti tao ket marikna ti menstrual pain dagiti babbai.
Panggep met ti nasao a kompanya nga ipakaawat kadagiti lallaki ti pudno a sasaaden dagiti babbai tunggal madanun ti period dagitoy.
Babaen iti daytoy ket makipagriknada kadagiti babbai ken ad-adda pay a raemenda dagitoy.
Maipakaammo a dagiti kompanya idiay Japan ket legal ti menstrual leave kadagiti babbai nga empleyado ngem saan a mabayadan ti aldaw dagitoy.
Maibasar met iti survey, kagudwa kadagiti population dagiti babbai nga empleyado idiay Japan ket ti saanda nga us-usaren ti menstrual leave.
Maipalagip nga itay met nabiit ket insingasing dagiti mamanday-linteg ti pannakaaprubar ti dua nga aldaw a menstrual leave nga awanan bayad kadagiti empleyado a babbai iti pagilian a Pilipinas.
