BOMBO NEWS ANALYSIS – Imbilin ni newly appointed Police Chief General Rommel Francisco Marbil ti pannakaiparit ti panagaramat ti cellphone kadagiti pulis bayat ti oras ti panagtrabaho dagitoy.
Naobserbaran gamin ti opisyal ti panagar-aramat iti cellphone dagiti pulis iti oras ti trabahoda.
Kinunana nga idi nagserbi daytoy a regional director ket adun a pulis ti sinitar ken impaayanna iti ballaag gapu iti saan a maiparbeng a panagar-aramatda iti selpon.
Nupay kasta, kinunana nga itan ket awan ti maipaay a ballaag kadagiti aglabsing a pulis agsipud ta iti kanito a matiliwanda ket dagus a maipaayan dagitoy ti disciplinary action.
Inlawlawagna a saan a rumbeng nga agbuya iti video wenno agay-ayam iti cellphone dagiti pulis bayat ti panagtrabahoda, imbes ketdi, rumbeng nga agpokusda iti panangipaayda iti seguridad iti publiko kas ti pananglapped ken panangrisutda kadagiti krimen.
Innayonna a rumbeng a maaramat laeng ti cellphone dagiti pulis para iti komunikasyon nangruna dagiti banag nga adda pakainaigan iti trabahoda.
Iti nagduduma a lugar, adda a talaga dagiti pulis nga agselselpon iti oras ti trabaho dagitoy.
Maysa daytoy a panagsayang iti oras ken iti buis a pagnanbannogan ti publiko.
Adda met dagiti saan nga agselselpon iti oras ti trabahoda ngem matmaturog, makiis-istorya wenno makumikomda kadagiti dadduma a banag a saan met a mainaig iti trabahoda.
Mapaspasamak daytoy saan laeng nga iti pulisya no di ket uray kadagiti dadduma pay nga opisina ken ahensiya ti gobyerno.
Sapay kuma ta maipatungpal met ti umasping a nainget nga polisiya kadagiti amin nga opisina ken ahensiya ti gobyerno tapno maisardeng dagiti kakastoy a saan a nasayaat nga aramid kadagiti dadduma nga empleado ti gobyerno.//Bombo Alfred Pudsoc
