Kinumpirmar ni Benguet State University (BSU) President Kenneth Laruan nga adda dagiti retirado nga empleyado ti BSU nga agnumnumar paylaeng iti housing ti nasao a pagadalan.
Kasaruno daytoy iti nagviral a pablaac iti maysa a social media page a mangiyebyebkas iti saan nga umno a proseso para iti housing ti unibersidad.
Iti nasao a pablaak, nakalanad nga adda dagiti empleyado a nagretiron iti serbisyo nga agnumnumar iti housing unit ken mangipas-pasa daytoy kadagiti kabagyanda wenno ti mala padrino system tapno makaala iti housing unit ken dadduma pay.
PROSESO ITI PANANGALA ITI HOUSING UNIT
Inlawlawag ni Laruan nga adda ti proseso a masursurot panggep iti housing no sadino adda ti nabukel a housing committee nga idadauloan ti Office of the Vice President for Administration and Finance.
Ti nasao nga opisina iti mangiproseso ken mangtingiting kadagitoy.
Inlawlawag ti nasao nga opisyal a nu adda man ti available a housing unit, daytoy ket gapu ta binakantean daytoy dagiti retired employees iti unibersidad.
Kalpasanna, i-assess ti nasao a committee ti available unit sada ipost for vacancy ken mailukat kadagiti amin a kwalipikado.
Apaman nga addan dagiti applicants, mairanggo dagitoy maibasar iti housing policy criteria.
Iti baet dayta, impetteng ti presidente a kadawyan a daytoy ti agbalbalin a violation dagiti nakaala iti housing unit gapu ta saanda a bakantean a dagos dagitoy.
Sigun kenni Laruan, nupay adda dagiti nagretiro a saan a makapagvacate a dagos, ipapaayanda daytoy iti tallo a bulan nga extension tapno bakanteanda ti unit, ngem kadawyan ket saandan a pumampanaw uray nalpasen ti naipaay nga extension.
Iti agdama, awan ti eksakto a numero nga impaay ti nasao nga unibersidad seknan iti bilang dagiti violators ngem nangipaay metten daytoy iti “Letter to Vacate” kadagiti indibidual a nanglabsing iti polisiya.
Iti baet dayta, naobserbaran ti COA a bayat iti panaglabas iti panawen ket manay-nayonan dagiti bilang dagiti manglablabsing kadagiti pagalagadan.
Malaksid iti dayta, kinuna ni Laruan a nagkiddawda metten iti assistance manipud iti Office of the Solicitor General ken mannarimaan metten ti panangisagana ti nasao nga unibersidad kadagiti kaskenan a dokument para iti posible a pannakaipila ti kaso kadagiti nanglabsing depende kadagiti violations nga inaramid da.
POLISIYA SEKNAN ITI HOUSING UNIT
Maibasar iti panagtingiting iti Bombo Newsteam iti 2024 Annual Report ti Office of the Vice President for Administration and Finance maipapan iti nasao nga issue, adda ti 16 a policy guidelines a nasken a suroten dagiti BSU Employeed a naipaayan iti housing unit.
Maysa kadagitoyen ti polisiya a mangpalpalubos kadagiti empleyado nga agtalinaed iti unit iti las-od ti limma a tawen no sadino maaddaan iti renewal iti mamin-uppat a daras, depende iti panagingiting iti housing committee.
(𝙍𝙪𝙡𝙚 #6: 𝙏𝙝𝙚 𝙜𝙧𝙖𝙣𝙩𝙚𝙚 𝙨𝙝𝙖𝙡𝙡 𝙗𝙚 𝙖𝙡𝙡𝙤𝙬𝙚𝙙 𝙩𝙤 𝙨𝙩𝙖𝙮 𝙞𝙣 𝙩𝙝𝙚 𝙪𝙣𝙞𝙩 𝙛𝙤𝙧 𝙖 𝙥𝙚𝙧𝙞𝙤𝙙 𝙤𝙛 5 𝙮𝙚𝙖𝙧𝙨 𝙨𝙪𝙗𝙟𝙚𝙘𝙩 𝙩𝙤 𝙧𝙚𝙣𝙚𝙬𝙖𝙡 𝙛𝙤𝙧 𝙪𝙥 𝙩𝙤 4 𝙩𝙞𝙢𝙚𝙨. 𝙏𝙝𝙚 𝙧𝙚𝙣𝙚𝙬𝙖𝙡 𝙬𝙞𝙡𝙡 𝙗𝙚 𝙨𝙪𝙗𝙟𝙚𝙘𝙩 𝙩𝙤 𝙩𝙝𝙚 𝙚𝙫𝙖𝙡𝙪𝙖𝙩𝙞𝙤𝙣 𝙤𝙛 𝙩𝙝𝙚 𝙝𝙤𝙪𝙨𝙞𝙣𝙜 𝙘𝙤𝙢𝙢𝙞𝙩𝙩𝙚𝙚 )
Malaksid iti dayta, karaman metlaeng kadagiti guidelines ti mangibagbaga nga apaman a nagretiro ti grantee, agleppas ti panagtaengna sadiay tallo a bulan kalpasan iti panawen ti panagretirona. Apaman nga adda ti saan a mapakadaan a pasamak kas iti untimely death, mabalin nga agtaeng dagiti kabagyan ti grantee iti nasao a housing unit iti maximum nga innem a bulan kalpasan iti ipupusay daytoy.
(𝙍𝙪𝙡𝙚 #15: 𝙒𝙝𝙚𝙣 𝙖 𝙜𝙧𝙖𝙣𝙩𝙚𝙚 𝙧𝙚𝙩𝙞𝙧𝙚𝙨, 𝙩𝙝𝙚 𝙖𝙡𝙡𝙤𝙬𝙖𝙗𝙡𝙚 𝙩𝙚𝙣𝙪𝙧𝙚 𝙤𝙛 𝙨𝙩𝙖𝙮 𝙨𝙝𝙤𝙪𝙡𝙙 𝙚𝙣𝙙 𝙖𝙛𝙩𝙚𝙧 3 𝙢𝙤𝙣𝙩𝙝𝙨 𝙛𝙧𝙤𝙢 𝙧𝙚𝙩𝙞𝙧𝙚𝙢𝙚𝙣𝙩. 𝙄𝙣 𝙘𝙖𝙨𝙚 𝙤𝙛 𝙪𝙣𝙩𝙞𝙢𝙚𝙡𝙮 𝙙𝙚𝙖𝙩𝙝, 𝙩𝙝𝙚 𝙗𝙚𝙫𝙚𝙖𝙧𝙚𝙙 𝙛𝙖𝙢𝙞𝙡𝙮 𝙢𝙖𝙮𝙗𝙚 𝙖𝙡𝙡𝙤𝙬𝙚𝙙 𝙩𝙤 𝙨𝙩𝙖𝙮 𝙛𝙤𝙧 𝙢𝙖𝙭𝙞𝙢𝙪𝙢 𝙤𝙛 6 𝙢𝙤𝙣𝙩𝙝𝙨 𝙖𝙛𝙩𝙚𝙧 𝙙𝙚𝙖𝙩𝙝.”)
Nailad metlaeng kadagiti pagalagadan (Rule #16) a saan a rumbeng nga aramaten ti housing unit para iti commercial purposes, subleasing, assignment wenno Transfer of the University unit ken dadduma pay.
Kanayonanna, sigun iti impormasyon a nakalap ti Bombo Newsteam seknan iti basic requirements, mabalin metlaeng nga ag-apply dagiti awanan asawa nga empleyado iti single housing bayat nga iti met family housing ti pag-applyan dagiti naasawaan ken dadduma pay.
Agpaut met iti agingga kinse laeng nga aldaw ti application para iti daytoy.
Dagiti sumagmamano a criteria for ranking a pagbasbasaran ti committee no asino ti pangipaayanda iti unit nga available ket ti nature of position, length of service, nature of work schedult, ownership of a house, spouse of the applicant ken child of the previous applicant.
Kabayatanna, impeksa ni Laruan a silulukat ti opisina daytoy para kadagiti addaan pakaseknan ken clarifications seknan iti nasao nga issue.
Iti agdama, awan pay laeng ti nang-approach kenkuana seknan iti nasao nga issue malaksid laeng dagiti pablaak iti social media. //via Bombo Noveh Organo
Watch Interview Here: https://www.facebook.com/share/v/1ABAJb2iwj/





