Posible a mapagsasaritaan ti sumagmamano nga “unfinished” legislative matters wenno saan pay a nalpas a napagtalantanan a gakat iti kanito a kiddawen ni President Ferdinand Marcos Jr. ti special session iti tengga ti impeachment complaint kontra kenni Vice Presidente Sara Duterte.
Daytoy ket sigun kenni Senate Minority Leader Aquilino “Koko” Pimentel III idi kalman.
Sigun kenni Senador Pimentel, ad-adda a “meaningful” ti special session nu dakamaten ni President Marcos dagiti “pending” a napateg a legislative matters kas kadagiti gakat maipapan iti judiciary fiscal autonomy, tax on e-vape, government rightsizing, chief state counsel, animal welfare, kasta metten ti panangipinal ti bicameral report on e-government bill, ken panagadal manen iti bicameral report on capital markets reform.
Kinunana nga apaman a matalantan dagiti naisingasing a gakat ket mabalin nga umaddang ti Senado a talantanen ti impeachment complaint kontra kenni Vice President Duterte.
Itay laeng nabiit, kinuna gamin ni Senate President Francis “Chiz” Escudero a mabalin a kiddawen ni President Marcos a mangisayangkat ti special session, ngem masapul a para iti pannakaipasa laeng dagiti kasapulan a linteg.
