Posible a maipatungpal manen ti sumaruno a Fishing tournament iti siudad ti Baguio inton Disyembre iti agdama a tawen wenno inton sumaruno a tawen.
Iti exclusive interview ti Bombo Radyo kenni Rafael Serrano, coordinator ti Burnham Lake Fishing Tournament, kinunana a kitkitaen paylaeng dagitoy no ania ti napintas a bulan a pakaipatungpalan ti nasao a torneo agsipud ta manmanu ti makalkalap a lames iti nasao a lake gapu paylaeng iti nalamiis a klima iti agdama.
Kabayatanna, naragsak inawat dagiti winners iti kaleppas nga 8th Fishing Tournament ti premyo dagitoy bayat ti flag-raising ceremony iti Baguio City Hall idi Setyembre a nuebe.
Sigun kenni Serrano, naragsak a nakipasetan daytoy dagiti tallo pulo ket lima a participants no sadino adda dagiti babbai, ubbing ken maysa gangganet ti nakipaset iti nasao a torneo.
Nagkampeon iti nasao a torneo ni Godofredo Quela kalpasan a nakatiliw daytoy iti lima a lames nga addaan ti kaatiddog a 43.5 inches no sadino nakaawat daytoy iti trophy ken P5,000 cash.
Naawat met ni second placer Cale Encarnation ti second-place trophy ken P3,000 cash kalpasan a nakatiliw iti uppat a lames nga addaan iti rukod a dumanon iti 35.5 inches bayat a nakaawat metlaeng ni third-placer Ronnie Paulino ti third-place trophy ken cash prize ken P1,000 cash kalpasan a nakatiliw iti uppat a lames nga addaan iti kaatiddog a 35 inches.
Gapu iti daytoy, imbinglay dagiti winners ti panagyamanda iti daytoy agsipud ta maysa daytoy nga achievement a naawatda.
