BAGUIO CITY – Ur-urayen ita ti lokal a gobyerno ti Baguio City ken dagiti organized taxi groups iti lokalidad ti sungbat ti lokal a gobyerno ti La Trinidad, Benguet iti kiddawda a panangi-synchronize wenno panangipada ti La Trinidad iti number coding scheme dagitoy para kadagiti taxi units iti agdama a number coding scheme ti Baguio para kadagiti taxi units.
Iti interview ti Bombo Radyo Baguio kenni Councilor Benny Bomogao, chairman ti Committee on Public Utilities, Transportation and Traffic Legislation iti City Council, kinunana a no saan a patgan ti lokal a gobyerno ti La Trinidad ti kiddawda ket irespetoda ti ordinansa ti ili seknan iti coding scheme para kadagiti taxi units nga agbibiahe iti masakupan ti La Trinidad.
Nailanad iti resolusyon ti lokal a konseho ti Baguio a pagimbagan dagiti umili no agpada ti number coding scheme dagiti taxi units nga agbibiahe iti Baguio ken La Trinidad.
Maipalagip nga agpaso inton October 31 ti baro a number coding scheme dagiti taxi units nga agbibiahe iti masakupan ti Baguio.
Dinakamat ti konsehal nga adda dagiti aldaw, partikular ti Martes, Miyerkoles ken Huwebes a saan a mabalin a makastrek sadiay La Trinidad ti sumagmamano a taxi units nga agtaud iti Baguio gapu iti implementasyon ti regular number coding ti nasao nga ili.
Nupay kasta, linawlawaganna a ti laeng pakaiyaplikaran ti regular number coding ti La Trinidad ket iti main highway, partikular iti Kilometer 3 agingga Kilometer 6 ken iti dadduma a kalsada sadiay ket mabalin a dumalyasat dagiti taxi units nga agtaud iti Baguio.
Inyunay-unayna pay a ti baro nga schedule iti panagbiahe dagiti taxi iti lokalidad ket para iti pagimbagan dagiti pasahero ken dagiti operators ken drivers dagiti taxi units.
