LA TRINIDAD, BENGUET – Agkurkurang ti suplay ti danum iti Benguet State University – Strawberry Farm kagiddan ti mapaspasaran a nabara a panawen gapu paylaeng iti epekto ti El Niño phenomenon.
Iti interview ti Bombo Radyo kenni John Dave Vinceo De Leon, Farmer Incubatee ti Strawberry Farm, ti maur-urnong dagitoy a danum manipod iti tudo ti sigud nga ar-aramatenda a pangsibog kadagiti mula.
Gapu ta awan ti napaspasaran a panagtudo kadagiti napalpalabas a lawas, agar-aramat dagitoy ti waterpump tapno makaalada ti danum manipod iti maysa a karayan nga asideg sadiay.
Kabayatanna, naobserbaran met ti adu a bilang dagiti turista a simmarungkar iti Strawberry Farm bayat ti long weekend.
Sigun paylaeng kenni De Leon, umdas ti suplay ti strawberry para iti strawberry picking ita bayat ti long weekend, kasta met dagiti suplay ti daduma pay a produkto kas ti lettuce ken broccoli.
Saan met a nagbaliw ti presyo ken rates dagitoy nu sadino agtaltalinaed a Php780 tunggal kilo ti strawberry iti strawberry picking, Php240 tunggal kagudwa a kilo ti bite size strawberry bayat a php130 tunggal 1/4 a kilo.
Kabaytanna, dumanon iti Php260 tunggal kagudwa a kilo ti medium size strawberry ken Php150 met tunggal 1/4 a kilo.
Ti met presyo ti Lettuce ket P50 tunggal kilo, Rommaine P70 tunggal kilo bayat a ti Broccoli ket P100 per kilo.//Bombo Jez Lapizar
