Inwaragawag ti National Task Force to End Local Communist Armed Conflict (NTF-ELCAC) a nakemmeg ti suspek iti pammapatay ti footballer a ni Keith Absalon ken ti kasinsinna a ni Nolven idi 2021 babaen kadagiti kameng ti Philippine National Police (PNP).
Malaksid iti dayta, nakemmeg metlaeng ni alias “Onang,” ti mapapati a nangato ti posision a kameng ti New People’s Army (NPA) ken maysa kadagiti most wanted individuals iti Bicol Region.
Ni alias “Onang” ket nakemmeg bayat ti operasion dagiti kameng ti pulisia idiay San Fernando, Masbate.
Sigun kenni National Task Force to End Local Communist Armed Conflict (NTF-ELCAC) Executive Director Undersecretary Ernesto Torres Jr., dandanin a magun-od ti hustisia para kadagiti Keith, Nolven ken ti pamilia dagitoy.
Ti operasion ket naisayangkat babaen iti arrest warrant nga impapaulog ti Regional Trial Court (RTC) 5th Judicial Region, Branch Masbate City.
Ni Onang ket sumangsango iti nagduduma a kaso a kas ti panaglabsing ti International Humanitarian Law and Other Crimes Against Humanity wenno ti RA 9851, iti sidong ti Criminal Case Nos. 21293 ken 21294 nga addaan ti piansa a P200,000 tunggal kaso.
Malaksid iti dayta, napilaan pay daytoy iti kaso a two counts ti murder nga awanan ti piansa a nairekomendar, ken maysa a count ti attempted murder nga addaan ti piansa a P120,000.
Ni Keith Absalon ken ti kasinsinna ket biktima ti Improvised Explosive Device (IED) blast bayat a paturong dagitoy iti pamiliada idiay Masbate.
