BAGUIO CITY – Inserbi ti National Electrification Administration Legal Services Office ti preventive suspension order kontra kadagiti pito a Board of Directors ti Benguet Electric Cooperative (BENECO) kasta met ti agserserbi a General Manager a ni Engr. Melchor Licoben.
Daytoy ket babaen kenni Atty. Omar Mayo manipud iti NEA Services Office.
Ti nasao a pammilin a naipaulog idi Setyembre 21 ket kasaruno ti kaso nga administratibo nga impila ni Atty. Ana Marie Paz Rafael kontra kadagiti pito a BOD kasta met kenni Engr. Licoben gapu iti saan a panangsurot dagitoy iti NEA-BOA Resolution 2021-71 a mangdutdutok kenni Atty. Rafael kas General Manager ti BENECO.
Agepekto ti nasao a pammilin iti 90 nga aldaw kontra kada Engr. Licoben, BOD President Esteban Somngi, Board of Directos Jefferd Acop, Mike Maspil, Peter Busaing, Jonathan Obar, Josephin Tuling, kenni Robert Valentin.
Kabayatanna, sinungbatan met ni BOD President Atty. Esteban Somngi ti naipaulog a preventive suspension order kontra kadakuada.
Iti suratna kenni Usec. Emmanuel Juaneza, alternate chairman – Board of Administrators ti NEA a naipost iti social media account ti BENECO, kinunana a ninamnamandan ti nasao a pammilin gapu iti natibker a pammatida a pabpaboran ti NEA ni Atty. Ana Maria Paz B. Rafael.
Impaganetgetna nga awan ti autoridad ti NEA a mangdutok kenni Atty. Rafael kas general manager ti Beneco.
Innayonna a kukuestionaranda met ti ligal a personalidad ni Atty. Rafael a mangidatag iti kaso nga administratibo kontra kadakuada agsipud ta saan met a member-consumer daytoy ti BENECO.
Innayunna pay a saan a sinurot ti NEA-BOA ti umno a proseso iti panangipaulogda iti PSO agsipud ta impaulog daytoy ti BOA ken pinirmaan ni USec. Juaneza. Kinunana nga awan ti bileg ti BOA a direkta a mangsupendir kadauada ken awan met ti autoridad ni USec. Juaneza a mangpirma iti daytoy.
Gapu iti daytoy, kidkiddawenda iti NEA BOA nga isanudda ti PSO ken surutenda ti umno a proseso.
Kinunana pay a rumbeng a maraem ti kaso nga impila iti Court of Appeals ni Engr. Licoben a mangkukuestion iti proseso iti panangdutok ti NEA-BOA iti general manager ti kooperatiba.
Kabayatana, nangipila met iti reklamo a graft ken suspension ti dadduma a Member-consumer-Owners (MCOs) ken empleado ti BENECO kontra iti NEA Board gapu iti panakadutok ni Rafael kas General Manager ti BENECO.
Karaman kadagiti pinilaanda iti kaso iti Office of the Ombudsman da Department of Energy (DOE) Usec. Emmanuel P. Juaneza and National Electrification Administration (NEA) Board of Administrators (BOA) Alipio V. Badelles, Agustin L. Maddatu, ken Rene M. Gonzales.
Ipetpetteng dagitoy a linabsing dagiti nasao nga opisyal ti Republic Act (R.A.) No. 3019 wenno Anti-Graft and Corrupt Practices Act, Secs. 4 ken 5 ti R.A. No. 6713 wenno ti Code of Conduct and Ethical Standards for Public Officials and Employees kasta met ti kaso nga administratibo seknan iti Grave Misconduct and Conduct Prejudicial to the Best Interest of the Service.
Nagramut ti nasao a kaso seknan iti panakadutok ni Atty. Anna Marie Rafael kas BENECO General Manager (GM) agsipud ta impettengda a saan a nasurot ti umno a proseso iti panakapilina ken patienda a saan a kualipikado daytoy iti nasao a puesto.
