Nakemmeg ti maysa a Taiwanese national iti siudad ti Baguio kalpasan nga iligal a nakastrek iti Pilipinas, sigun iti Bureau of Immigration (BI).
Nabigbig ti suspek a ni Cheng Chin-Pang, agtawen ti innem a pulo ket siam.
Sigun iti Bureau of Immigration, natiliw ni Pang idi September 25 idiay Sto. Tomas Road, Green Valley, Dontogan, Baguio City
Maibasar iti report, kinuna ti nasao nga ahensia nga inaklon ti ganggannaet a nakastrek daytoy iti Pilipinas idi napalabas a tawen babaen iti backdoor route idiay Tawi-tawi.
Sumagmamano metlaeng a ganggannaet ti nakemmeg gapu iti panangpadasda a sumrek wenno rummuar iti Pilipinas babaen iti iligal a pagnaan.
Iti maysa nga statement, kinuna ti Immigration a mapapati a naglugan daytoy iti bangka manipod Malaysia sakbay a nakastrek idiay Manila a saan a naipasidong iti umno nga immigration inspection.
Nagballaag ti nasao nga ahensia kadagiti ganggannaet kontra kadagiti wagas wenno iligal a panagserrekda babaen ti panangiyemplementar iti operasion dagitoy kas maitunos iti direktiba ti agdama nga administrasion.
