Nauram dagiti tallo a pagtaengan bayat a nadangran ti maysa nga indibidual sadiay Purok 5 Bakakeng Central, Baguio City itay 4:45 iti malem.
Iti pannakiuman ti Bombo Radyo kenni Menandro Busania, kaaruba ti nauram a balay, kinunana a napasamak ti uram kalpasan a nagpuor ti 65-anyos a lalaki iti basura ken lupot iti uneg ti pagtaenganna.
Sigun kenkuana inanawada daytoy, ngem kinuna ti nasao a lalaki a pang-abog laeng daytoy iti lamok.
Nupay kasta, kellaat daytoy a nagramaram daytoy agsipud ta naaramid laeng ti nasao a pagtaengan iti light materials a nangitunda iti pannakauram dagiti nasao a pagtaengan.
Pinadas met dagiti kakaaruba daytoy a sebseban ti nasao nga uram bayat nga ur-urayenda dagiti bombero nga agsebseb ngem saandan a nabaelan gaputa pimmigsa ti nasao nga uram.
Nagramaram pay daytoy rason a nairaman a napuuran dagiti abayna a dua a pagtaengan.
Narigatan metlaeng dagiti otoridad a nangsebseb iti nasao nga uram gaputa nasulinek daytoy rason a saan a makastrek dagiti fire truck a nangitunda iti nabayag a pannakasebsebna.
Gapu iti dayta, dua a pamilya ti naapektaran iti daytoy a buklen dagiti agarup walo nga indibidual.
Naideklara met a fire out ti uram iti 6:08 itay malem metlaeng.
Kabayatanna, naduktalan met nga adda ti mental health problem ti nasao a lalaki.
