BAGUIO CITY – Nakemmeg ti dua a high value target iti anti-illegal drug buy-bust operation a naisayangkat sadiay Talingting, Pagal, Shilan, La Trinidad, Benguet.
Nabigbig dagitoy a da Wensley Eduardo Camora, 39-anyos, naasawaan, driver ken Darwin Eduardo Camora, 37-anyos, baro, helper ken agpada a residente ti Bahong, La Trinidad, Benguet.
Nakumpiskar kenni Wensley Camora ti tallo a pakete ti maatap a shabu bayat a nakumpiskar kenni Darwin Camora ti dua pay a pakete ti maatap a shabu ken sumagmamano a drug paraphernalia.
Narekober pay manipud kadagiti dua ti naaramat a boodle money a bukbuklen ti dua a pudpudno a 1,000 peso bill ken 14 a pidaso ti peke a 1,000 peso bill.
Naamuan a dagiti dua ket drug surrenderee ti La Trinidad Municipal Police Station ken nabigbig manen kas high value target.
Kabayatanna, nakemmeg ti maysa a lalaki kapada nga operasyon a naisayangkat iti maikatlo a kadsaaran ti Maharlika Livelihood Complex sadiay Abanao Street, Baguio City.
Nabigbig daytoy a ni Alfredo Tablada Depollo alyas Lovely Depollo wenno Tweetie, 46-anyos, maysa a beautician, tubo ti Meycauayan, Bulacan ken residente ti Gibraltar, Baguio City.
Nakumpiskar kenkuana ti dua a pakete a maatap a shabu bayat a narekober kenkuana ti naaramat a boodle money.
Sumangsango ita dagiti tallo iti kaso a panaglabsing iti RA 9165 wenno ti Comprehensive Dangerous Drugs Act of 2002.
