Inarestar dagiti otoridad sadiay Florida ti tallo a Pilipino nga empleyado ti maysa a cruise ship gapu iti kaso dagitoy nga adda pakainaiganna iti child pornography.
Nabigbig dagiti akusado a da Tirso Neri, 44-anyos; Alvin Gonzales, 49-anyos; ken Amiel Trazo, 28-anyos.
Ti panakaarestar dagitoy ket kasaruno ti impatungpal a nainget nga imbestigasyon dagiti kameng ti US Department of Homeland Security Investigations Task Force ken ti United States Custom and Border Protection nu sadino, natakwatan a naglaon ti cellphone ni Neri ti folder nga addaan ti explicit images ken videos dagiti ubbing nga agtawen siam agingga katorse.
Nupay kasta, nainget a pinaglibakan ti akusado daytoy ken indepensarna nga indownloadna laeng manipod social media ti nasao a folder ken saanna nga ammo a naglaon daytoy kadagiti nasao a content.
Kapada metlaeng a content ti nadiskubre iti cellphone ni Trazo nu sadino, karaman met ti agtawen dose agingga katorse nga ubbing.
Gapu iti dayta, kinumpiskar dagiti otoridad daytoy. Impudno met ni Trazo nga impatulodna pay dagiti nasao a content iti nobyana ken kadagiti gagayyemna.
Iti sabali a bangir, nadiskubre met iti cellphone ni Gonzales ti eight-minute sex video a karaman ti maysa a menor de edad.
Amin dagiti akusado ket sumangsango iti kaso a possession and transportation of child pornography nu sadino saan a napatgan nga agpiansa da Trazo ken Neri bayat a dumanun met iti $20k ti masapol nga ipiansa ni Gonzales.
