Impablaak ni Benguet Congressman-elect Eric Yap iti social media account daytoy a dinismiss ti Commission on Elections (COMELEC) Second Division ti tallo a disqualification case a naipila kontra kenkuana.
Nupay kasta, kinuna a manarimaan paylaeng ti pannakaresolba dagiti uppat a nabatbati a disqualification cases kontra kenkuana.
Iti baet dayta, adda pay dagiti baro manen nga aksyon nga inaramid ti dadduma a kampo tapno lapdan nga agtugaw daytoy kas Representative ti Benguet para iti 20th Congress.
Maladingitan pay daytoy agsipud ta adu dagiti naapektaran a serbisyo ken programa a possible a maileppas ket marugyan.
Iti baet dayta, kinunana a saanda nga itulok a maabak daytoy rason a mangipila met dagitoy iti counter charges.
Kagiddan iti dayta, inyebkasna manen iti panagyamanna kadagiti umili gapu iti agtultuloy a suporta dagitoy.
Malaksid iti dayta, kiddawna metlaeng ti panagkaykaysa dagiti umili para iti panagprogreso ti probinsya ti Benguet.
Maipalagip nga agingga iti agdama ket saan paylaeng a naiproklama ni Yap gapu kadagiti sangsanguenna a disqualifaction cases a naipila kontra kenkuana a mangkwekwestiunar iti citizenship daytoy ken dadduma pay.
