BAGUIO CITY- Nakemmeg ti dua a driver a maibilbilang kas Street Level Individual iti iligal a droga kasaruno ti buybust operation a naisayangkat idi Mayo 27 sadiay Malcom Square, Baguio City
Nabigbig dagitoy a da Leandro Fortugal DeoGracias, 37 anyos, naasawaan, taxi driver ken residente ti P1 Kias, Baguio City ken Verde Villaduz Dumagcao, 43 anyos, awanan asawa, van driver ken residente ti Loakan Magsaysay Baguio.
Maibasar iti report, nakumpiskar manipod kadakuada ti maysa a pakete a naglaon iti mapapati a shabu nga agdagsen iti 0.5 grams nga aggatad iti P2,500.
Malaksid iti dayta, naala pay manipod kadakuada ti buybust money ken cellphone a naaramat iti transaksion.
Sumango dagitoy iti kaso a panaglabsing iti RA 9165 wenno Comprehensive Dangerous Drugs act of 2002
Kabayatanna, nakemmeg ti maysa pay a lalaki a maibilbilang kas Street Level Individual sadiay Purok Magsaysay, Loakan Proper Baguio City kasaruno iti naisayangkat a search warrant idi metlaeng rabii
Nabigbig daytoy a ni Nomar Villanuevo alyas Omar, 36 anyos, basurero, awanan asawa ken residente iti nadakamat a lugar
Maibasar iti report, nadiskubre manipod iti ab-abangan ti lalaki a kwarto ti tallo a pakete ti mapapati a shabu nga agdagsen iti nasurok kumurang 1.5 grams ken aggatad iti 10,200
Malaksid iti dayta, naala pay iti panagsukimat dagiti otoridad ti siyam nga empty shells ti bala ken maysa a live ammunition, nagduduma a drug paraphernalia nga addaan iti residue ti mapapati a shabu ken maysa a maatap a hand grenade.
Iti agdama, adda ita iti kustudiya ti BCPO Stn 4 ti suspek ken sumango iti kaso a panaglabsing iti Sec 11 ken Sec 12 ti RA9165, Sec 3 ti RA 10591, RA 9516 ken Omnibus Election Code.
