Kinemmeg ti nagtitinnulong a pwersa ti Philippine Drug Enforcement Agency-Cordillera, Regional Mobile Force Battalion 15-TSC, ken ti Baguio City Police Station- Police Station 2 ti tallo nga indibidual iti naipatungpal a buy-bust operation idiay Pinsao Pilot, Baguio City itay laeng kanikadua.
Natiliwan dagitoy nga aglaklako iti maatap a shabu babaen iti panagpammarang ti maysa a kameng ti Philippine Drug Enforcement Agency-Cordillera a kas posuer buyer.
Nakumpiskar kadakuada ti agarup 5.2 grams iti maatap a shabu (methamphetamine) nga aggatad iti mapatta-patta nga ₱11,360.
Malaksid iti dayta, nakumpiskar metlaeng dagiti non-drug evidences pakairamanan ti maysa a genuine P1000 bill, siyam a pidaso iti P1000 boodle money, maysa a kotse, tallo a cellphone, maysa nga improvised tooter nga addaan ti residue, dua nga plastic sachet nga awanan ti nilaon, ken nagduduma nga ID.
Sumangsango ita dagiti akusado iti panaglabsing ti Republic Act 9165 wenno ti Comprehensive Dangerous Drugs Act of 2002.//Bombo Jez Lapizar
