Impablaak ti Israel ti nagan dagiti tallo a nakautibo ti Hamas a naituding a mawayawayaan ita a Sabado kagiddan ti maika-innem a panagsinnukat dagiti hostage ken balud a Palestinian iti sidong ti ceasefire deal a nangrugi idi napalabas a bulan.
Sigun iti Israel, palubusan ti Palestinian militants da American-Israeli Sagui Dekel-Chen, Russian-Israeli Alexandre Troufanov ken Argentinian-Israeli Iair Horn.
Kas kasukat, manamnama a palubusan met ti Israel ti 369 a balud a Palestinian.
Naipablaak ti nasao a nagan kalpasan ti panagsusupiat ita a lawas iti nagbaetan ti Hamas ken Israel maipapan iti Gaza ceasefire, kalpasan a kinuna ti Hamas a saanda a wayawayaan dagiti Israeli hostages idi Sabado gapu kadagiti maipagarup a panaglabsing ti Israel.
Nupay kasta, narisut ti saanda a panagkikinnaawatan idi Huebes idi kinuna ti Hamas a wayawayaanda dagiti hostage kas naiplano.
Maipalagip a nangrugi ti gubat iti nagbaetan ti militante a grupo ti Hamas ken Israel idi immuna a rimmaut ti Hamas kontra iti Israel idi October 7, 2023 a nakatayan ti rinibribu nga indibidual.
