PINUKPUK, KALINGA – Malamlamayan ita ti bangkay dagiti tallo nga ubbing a nalmes bayat ti panaglangoyda iti Chico River idiay Junction, Pinukpuk idi kalman, Hulyo 7.
Iti exclusive interview ti Bombo Radyo kenni PMaj. Chester Boclongan, Acting Chief of Police ti Pinukpuk MPS, nabigbig dagitoy a da Xia Mananeng, 9-anyos; Mia Dela Cruz, 9-anyos ken Aico Daluping, 6-anyos, bin-ig a residente ti Sitio Collog, Junction, Pinukpuk, Kalinga.
Maibasar iti imbestigasyon, nagturong dagiti biktima iti nasao a karayan tapno aglangoy kadwa-da ti dua a daduma pay para iti ‘palanus‘ iti nasao nga aldaw.
Bayat ti panaglangoyda, napansin ti kadwa-da a 16-anyos a malmalmes ti 9-anyos nga ubing iti nauneg a paset karayan.
Pinadas ti 16-anyos nga ispalen ni Mananeng ngem saanna a ninamnama a sinurot daytoy da Dela Cruz ken Daluping a rason met ti panakalned dagitoy.
Naitaray iti ospital dagiti biktima ngem dead on arrival dagitoy.
Mapalpalagipan dagiti residente nga agannad dagitoy iti panagturongda kadagiti karayan bayat ti panagtutudo ken kanayon nga ipakaammo kadagiti nagannak ti aramiden wenno pagturturongan a lugar.
Ti palanus ket pre-wedding celebration idiay Kalinga nu sadino maipatpatungpal daytoy tapno kumpirmaren ti panagkaykaysa ti manmanama nga agkallaysa a lalaki ken babai.
