Naragsak nga impakaammo ti City Government idiay Tabuk City babaen iti City Veterinary Services Office (CVSO), a naideklara dagiti tallo pulo ket walo a barangay manipud kadagiti uppat a pulo ket tallo a barangay sadiay kas African Swine Fever Free.
Sigun iti City Veterinary Services Office, naideklara dagitoy agsipud ta nagtungpalda kadagiti pagalagadan ken requirements kas mainaig iti Department of Agriculture Administrative Order (DA AO) No. 07, Series of 2021 nga “Implementing Guidelines for the Barangay Bantay ASF Program, ken iti Department of Agriculture Administrative Order No. 30, Series of 2021 wenno ti “Guidelines on the Recovery and Declaration of Freedom from ASF for Local Government Units (LGUS)”.
Nupay kasta, saan naideklara kas African Swine Fever free dagiti lima a barangay sadiay pakairamanan ti Agbannawag, Cudal, Bado Dangwa, San Julian, ken Bulanao gapu ta maur-uray paylaeng ti resulta ti laboratory testing dagitoy.
Kabayatanna, naipaayan met dagiti nadakamat a tallo pulo ket walo a barangay iti African Swine Fever rapid test kits ken disinfectants.
