BAGUIO CITY – Maaw-awis amin dagiti vendors ken stakeholders iti Baguio City Public Market tapnu agturongda iti Multi-Purpose Hall ti Baguio City Hall inton March 4, aldaw ti Huwebes iti alas-dos ti malem tapnu maipalawag kadagitoy ti manarimaan a proseso para iti modernisasyon ti merkado ti siudad.
Iti interview ti Bombo Radyo Baguio, kinuna ni City Administrator ken Public-Private Partnership for the People (P4) Committee chair Engr. Bonifacio dela Peña a mismo a daytoy ti mangilawlawag iti kaipapanan ti Public-Private Partnership Modality para iti panakapasayaat ti merkado publiko.
Kinunana a maaramid ti nasao a taripnong gaputa maal-allilaw dagitoy gapu kadagiti dadduma nga indibidual a tila-tila ti ibagbagada seknan iti nasao a sistema.
Inyunay-unayna met nga iti benneg ti P4 Committee ket a saan a mall-type ti maibangon a baro a pasdek ti merkado publiko ngem ketdi, maysa nga ordinaryo a commercial establishment.
Innayonna a resrespetuenna ti karbengan dagiti mangisaysayangkat ti noise barrage kontra iti atapen dagitoy a panagbalin a mall ti Baguio City Public Market.
