BAGUIO CITY – Agtultuloy ti panagpaimbag dagiti indibidual a nadangran iti panagbaliktad ti maysa a van sadiay Sitio Lonnog, Brgy. Mabaca, Tanudan, Kalinga idi Pebrero 7.
Maipalagip a pimmusay ti tallo a tattao bayat a siam ti nadangran iti nasao nga aksidente.
Immunan a nabigbig dagiti pimmusay a da Roderick Sucliyao, Marcelina Dupagan Sapon ken Cresencia Cayangao nga agpapada a mannursuro.
Nadangran met iti insidente da Ralyn Lugao Dao-ayan, James Ballay Abuwak, Fernando Salvador Ducasao, Arian Kathlyn Dulanao, Leonida Abuwak Puctiyao, Hubert Abuwak, Francisca Dangpason Addagan, Nathaniel Dalanao Jr., ken ti driver a ni Jay-ar Ducasao.
Iti interbyu ti Bombo Radyo ken ni PCOL Job Russel Balaquit, Provincial Director ti Kalinga Police Provincial Office, agturong koma dagiti biktima sadiay Bulanao, Tabuk City tapno makipaset dagitoy iti Bodong Festival kagiddan ti founding anniversary ti Kalinga.
Kinunana a napukaw ti kontrol ti driver iti manebela ti lugan kabayatan ti panagdaliasat daytoy iti pasalog ken kurbada a paset ti kalsada a nagresulta iti aksidente.
Agpapaimbag ita dagiti nadangran iti Kalinga Provincial Hospital (KPH), Almora General Hospital, ken Cagayan Valley Medical Hospital (CVMC).
