BAGUIO CITY – Dakkel ti panagyaman ti maysa a turista ditoy siudad ti Baguio gapu iti panangisubli ti maysa a taxi driver kadagiti kagawaanda a nabati iti taxi babaen iti tulong ti Bombo Radyo ken ti City Disaster Risk Reduction and Management Council (CDRRMC).
Segun kenni Ms. Ghee manipud Mariveles, Bataan, nabatida iti taxi ti tallo a bag a naglaon iti gargaret ti maladaga ken dagiti annakna.
Kinunana a binagaan daytoy ti naglugananna a taxi nga agreport iti Bombo Radyo gaputa ditoy a kadawyan a maisubsubli dagiti mabatbati a kagawaan iti taxi.
Kalpasan nga inala ti personnel ti Bombo Radyo ti detalye ti lost item ket nag-ring ti telepono, maysa nga empleyado ti CDRRMC ti adda iti linya ken impakaammona nga inturong ti taxi driver iti opisinada ti sumagmamano a kagawaan a maitunos iti lost items nga impanawagan ni Ms. Ghee.
Kalpasan ti sumagmamano a minutos ti panagsaritada ket dimteng iti istasyon ti Bombo Radyo dagiti empleyado ti CDRRMC ken ti taxi driver ken insublida dagiti kagawaan.
Kinuna met ni Ryden Apolonio Rafael, driver ti Acat Taxi nga addaan iti registration plate a 1404 10, nga uray bassit a banag laeng ti nabati iti taxina ket isubsublina gaputa amanganta kasapulan daytoy ti agtagikua.
Kinunana pay a ti siudad ti Baguio ket maysa a tourist destination isut gapuna a rumbeng laeng a maital-o ti napintas a panag-ug-ugali dagiti taga-Baguio.
Naamuan a namin-adun a nangisubli daytoy kadagiti kagawaan a nabatbati iti uneg ti imanmanehona a taxi.
Ni Rafael ket 39-anyos, tubo ti Sablan, Benguet, addaan daytoy iti dua nga anak, ken nasurok sangapulo a tawen nga agpaspasada iti taxi ditoy siudad.
