Ngimmato ti kaso iti teenage pregnancy iti municipyo ti Sagada Mountain Province, maibasar iti datos ti Municipality Health Office (MHO) ita a tawen no idilig idi napalabas a tawen.
Maibasar iti datos ti nasao nga aghensia, nakailista dagitoy iti sangapulo ket tallo a kaso manipud Enero agingga Hunio iti agdama a tawen no idilig iti pito bilang idi napalabas a tawen.
Sigun kenni Geraldine A. Alangui, Nurse III ti Municipal Health Office ti Sagada, pakaseknan dagitoy ti killaat a panagngato iti kaso ti teenage pregnancy iti nasao a lugar a nangitunda iti panagsardeng dagiti estudyante iti panagadalda tapno taripatuenda dagiti annakda.
Gapu iti daytoy, pinaingetan ti nadakamat nga ahensia ti kampaya dagitoy kontra iti teenage pregnancy babaen iti panangiwaras iti Information, Education, Communication wennu IEC.
Iti sabali a bangir, maidiadiaya ti Alternative Education System para kadagiti Teenage Mother, no sadino pinasayaatda pay ti implementasion ti inclusive environment para kadagiti student mothers babaen ti alternative education system.
Panggep daytoy mangipaay iti gundaway kadagiti student mothers nga umawat iti de kalidad nga edukasion iti baet ti responsibilidad dagitoy kas maysa nga ina.
Malaksid iti dayta, mangipaay pay daytoy iti panakaamo iti flexible classes, panangaywan iti ubing ken dadduma pay a suporta a naibasar kadagiti pagkasapulanda.
Sigun ken ni Ignacio Pelila, School Principal ti Sagada National High School, maipaayan dagiti student mother iti modular lessons ken maidiaya ti modular classes para kadagitoy.
Innayun ti nasao nga opisial, nga agtultuloy ti panagreggetda a mangparmek iti teenage pregnancy iti lugar dagitoy babaen kadagiti alternatibo a solusion.//via Fejelyn Sabino, Local News Correspondents, Sagada Mountain Province
