Manamnama nga agleppas ti naipaay a temporaryo a permit kadagiti vendors nga agilako iti batog ti lion’s head iti Kennon Road inton Mayo a trese iti agdama a tawen.
Iti panakiuman ti Bombo Radyo kenni Angelina Ramos, kapitan ti Camp 7, Baguio City, impakaamona a ti temporaryo a permit a naipaay kadagiti vendors ket aglas-od ti maysa a bulan a nangrugi idi Abril a trese.
Kalpasanna dayta, agsublida iti naikeddeng a pagpwestoan dagitoy agsipud ta maikonsidera a napeggad ti pagilaklakoanda nga asideg iti kalsada.
No pay kasta, pakaseknan dagiti vendors ti intuding a pagilakoan dagitoy gapu ta kasapulan a sumang-at ken bumalasiw, rason no apay a mamingsan ket maluglugi ken matumal ti pamastrekan dagiti agilaklako.
Kabayatanna, kalpasan ti panaglukat ti Kennon Road ket bassit pay laeng ti magmagna a motorista iti daytoy.//M
