BAGUIO CITY – Tone-tonelada a natnateng manipud kadagiti stakeholders ti vegetable industry iti probinsia ti Benguet ti naituding a maibiahe paturong sadiay Batangas para kadagiti biktima ti panagbettak ti Taal Volcano.
Iti interview ti Bombo Radyo kenni Agot Balanoy, panakabagi ti liga dagiti asosasyon iti La Trinidad Vegetable Trading Post, kinunana a batang met ti Deparment of Agriculture ti mangipaay iti maaramat a truck.
Kinunana a posible nga inton Lunes ket maiturongen sadiay Batangas dagiti nasao a nateng a dumanon iti tallo a tonelada, ken partikular nga aw-awatenda a donasyon dagiti nateng a saan a dagus a malungtot.
Umaw-awatda met iti cash donations a panggatangda kadagiti immediate needs kas iti sanitation kits ken hygiene kits a direkta a maiwaras kadagiti biktima.
Innayonna nga adda metten dagiti nangun-una ken mangun-una a donasyon kas iti natnateng ken in-kind a maiturong sadiay Batangas manipud iti nagduduma a grupo ken lokal a gobyerno iti Benguet.
Dinakamat ni Balanoy a nakasagana dagiti taga-Benguet a mangited ti tulong kadagiti agkasapulan a kailyan la ketdi adda ti maited a tulong nangruna ta idi dagiti taga-Benguet ti nagkasapulan idi ket adu dagiti simmangbay a tulong manipud kadagiti kakailyan.
