BAGUIO CITY – Mangnamnama ti Provincial Tourism Office ti Benguet a mapadur-as ken mapatibker pay ti sektor ti turismo iti probinsia kagiddan ti panakailukat manen dagiti pagpasyaran iti kaaduan a munisipyo iti Benguet.
Iti interview ti Bombo Radyo Baguio, kinuna ni Benguet Provincial Tourism Officer Eleazar Carias a daytoy ket gaputa kabayatan ti panakairikep dagiti tourism sites ita a pandemya ket ginundawayan dagiti stakeholders a nangpapintas kadagiti imatmatonda a pagpasyaran.
Innayonna a kabayatan ti pandemya ket nasurok a 30 a baro a tourism sites ti naglukat iti probinsia a kaaduanna ket farm tourism sites.
Nupay kasta, mangnamnamda nga in-inot a mailukat met ti turismo kadagiti munisipyo ti Bakun, Bokod ken Kibungan nangruna ta nakasagana metten nga aglukat dagiti tourism sites a privately-owned.
Kabayatanna, agtultuloy met ti panang-seminar ken panangsanayda kadagiti tour guides iti probinsia.
Dinakamatna a ngimmato met ti vaccination rate kadagiti stakeholders ti tourism industry kas kadagiti tour guides.
Innayon ni Carias a naluklukay ita dagiti pagalagadan iti turismo iti Benguet nupay naibilin kadagiti operators ti kanayon a panakaipalagip ti panagtulnog dagiti turista kadagiti health protocols.
Maibasar iti datus ti Provincial Tourism Office ti Benguet, nasurok iti 1.6 million ti tourist arrival ti probinsia idi 2019 bayat a nasurok laeng iti 214,500 idi napalabas a tawen.
