Nangrugin ti tallo nga aldaw a transport strike ti grupo a MANIBELA kadagiti sumagmamano a paset ti pagilian ita nga aldaw.
Nopay kasta, saan a makipaset ti rehiyon Cordillera iti nasao a tigil-pasada.
Sigun kenni Reynardo Bacoco, presidente ti Baguio PUV Transport Corporation, kinunana a nabayag a saanda nga ar-aramiden ti tigil-pasada no daytoy ket maisaysayangkat gapu ta ammoda a dagiti maagrabyado iti nasao a banag ket dagiti pasaheros.
Kinuna ni Bacoco, silulukat met ti Land Transportation Franchising and Regulatory Board (LTFRB) para iti panagsubmitir dagitoy iti kayatda a mapasamak kasta met a saanda nga idagdagadag ti implementasyon ti modernization dagiti jeepney.
Ngem, inyunay-unay ni Bacoco a pangepda a maamoan dagiti bilang dagiti lugan nga agbibiyahe tunggal ruta tapno ammoda ti aramidenda no maipatungpal ti modernization.
