Nadadael ti sangwanan a paset iti maysa a PNP mobile light vehicle kalpasan a natennagan daytoy iti tree branch bayat ti panagdalyasat dagiti dua a kameng iti pulisya idiay Kennon Road, partikular idiay Zigzag Road, Camp 7, Baguio City.
Karaman a nadadael ti front windshield, blinker, ken duck tail stoplight iti nasao a lugan bayat a naaddaan met iti yupi ken gasgas ti front hood ken bubungan daytoy.
Kabayatanna, ti driver iti nasao a lugan ket maysa a lalaki, agtawen iti 37, addaan iti asawa, maysa a kameng iti pulisya, ken residente iti Baguio City, kadwana ti kapadana a pulis a residente metlaeng iti nasao a siudad.
Nagapo dagitoy sadiay Camp Crame, Quezon City ken paturongda sadiay Camp Bado Dangwa, La Trinidad idi napasamak ti insidente.
Awan met ti nadangran kadakuada ken awan pay ti naipaay nga impormasyon maipapan iti cost of damage iti nasao a lugan.
Temporaryo met a nakaparada daytoy iti sangwanan ti Baguio City Police Office-Police Station 8.//Bombo Genzel Depayso
